दूरदृष्टि
जननेता मदन भण्डारी तथा नेपालको संविधानका आधारभूत मान्यतामा आधारित न्यायूर्ण, समृद्ध र समतामुलक नेपाली समाजको स्थापना गर्न योगदान गर्नु फाउन्डेसनको दूरदृष्टि रहेको छ ।
परिलक्ष्य
जननेता मदन भण्डारीको बहुआयामिक व्यक्तित्व तथा उहाँद्वारा प्रतिपादित जनताको बहुदलीय जनवाद सिद्धान्तबारे विभिन्न खोज, अध्ययन, अनुसन्धान र प्रवद्र्धन गर्नुका साथै शिक्षा, स्वास्थ्य, उद्यमशीलता, खेलकुद, साहित्य र साँस्कृतिक विकास, मानवअधिकार, शान्ति तथा न्यायको प्रवद्र्धन तथा सामाजिक सेवा र समाज कल्याण एवम् सामाजिक सचेतनाका कार्यद्वारा समतामूलक, समृद्ध र न्यायपूर्ण समाजको निर्माणका लागि योगदान गर्नु फाउन्डेसनको परिलक्ष्य रहेको छ ।
मुख्य उद्धेश्य
फाउन्डेसनका मूलभूत उद्देश्य देहाय बमोजिम रहेका छन्ः
- देशको शिक्षा, संस्कृति, राजनीति जस्ता समसामयिक मुद्दामा छलफल चलाउँदै उत्कृष्ट चिन्तन संस्था (थिंक ट्यांक) का रुपमा विकास गर्ने ।
- देशमा व्याप्त गरीबी, बेरोजगारी हटाउन कार्यक्रमहरु संचालन गर्ने तथा भ्रस्टाचार र कुशासनका विरुद्ध विशेष अभियान संचालन गर्ने ।
- शिक्षा जनस्वास्थ्य, वातावरण, प्राकृतिक स्रोत तथा जनसंख्या व्यवस्थापनसम्बन्धी अध्ययन अनुसन्धान तथा कार्यक्रमहरु संचालन गर्ने ।
- देशको समग्र आर्थिक, सामाजिक विकासमा सहयोग पु¥याउन नीतिगत तहमा सल्लाह र सुझाव प्रदान गर्ने ।
- शान्ति, सुशासन तथा मानवअधिकारका पक्षमा जनमत सृजना गर्न विभिन्न कार्यक्रमहरु तर्जुमा गरी अभियान संचालन गर्ने ।
- विभिन्न प्रकाशनहरु गर्ने ।
नेतृत्व
फाउन्डेसनको नेतृत्व आवधिक राष्ट्रिय सम्मेलनबाट हरेक तीन वर्षमा निर्वाचित हुन्छ । फाउन्डेसनमा अविच्छिन्न रूपले एकजना संरक्षक रहने व्यवस्था अनुसार हाल नेपालका पूर्वप्रधानमन्त्री केपी शर्मा ओली संरक्षक रहनुभएको छ । फाउन्डेसनको केन्द्रमा एक जना निर्वाचित अध्यक्ष, एक केन्द्रीय कार्यसमिति, दैनिक कार्य सञ्चालन गर्न एक सचिवालय तथा पाँचवटा विभिन्न विभागहरु रहेका छन् । शिक्षा तथा अनुसन्धान विभाग फाउन्डेसनको एक महत्वपूर्ण अंग रही आएको छ ।
गतिविधि
फाउन्डेसनले राष्ट्रिय महत्वका विविध विषयमा निरन्तर छलफल र अन्तरक्रिया सञ्चालन गर्दै आएको छ । फाउन्डेसन अन्तर्गत काठमाडौंमा मदन भण्डारी मेमोरियल सामुदायिक कलेज सञ्चालित छ‚ जसले कम्प्युटर विज्ञान, मानविकी तथा समाजशास्त्र, व्यस्थापन र पत्रकारिता विषयमा स्नातकोत्तर तहसम्मको शिक्षा प्रदान गर्दछ । काठमाडौं गोकर्णेश्वरमा मदन भण्डारी मेमोरियल विद्यालय सञ्चालनमा रहेको छ, जहाँ माध्यमिक तह सम्मका विधार्थीहरूले अध्ययन गर्ने व्यवस्था मिलाइएको छ । फाउन्डेसनबाट धेरै पुस्तक, नीति अनुसन्धान, कार्यपत्रहरु प्रकाशित छन् भने अनुसन्धानात्मक कार्यहरु पनि निरन्तर चलिरहेका छन् । शिक्षाको क्षेत्रबाट समाज र नागरिकको सेवामा लागिपर्ने फाउन्डेसनको उद्देश्यअनुरूप उच्च तहको अनुसन्धान कार्यलाई मद्दत गर्न मदन भण्डारी शैक्षिक कोषको स्थापना गरिएको हो ।